ଧିଙ୍ଗିରି ଛତୁ ଚାଷ ପ୍ରଣାଳୀ ….

 ଓଡ଼ିଶାର ଜଳବାୟୁକୁ ଆଧାରକରି ମୁଖ୍ୟତଃ ଦୁଇପ୍ରକାରର ଛତୁଚାଷ କରାଯାଇଥାଏ । ଏହି ଦୁଇପ୍ରକାରର ଛତୁ ମଧ୍ୟରୁ ପାଳ ଛତୁଟି ବର୍ଷର ମୁଖ୍ୟତଃ ମାର୍ଚ୍ଚଠାରୁ ଅକ୍ଟୋବର ମାସ ଯାଏ ଚାଷ ହୋଇଥାଏ । 

ଅନ୍ୟ ଛତୁଟି ହେଲା ଧିଙ୍ଗିରି ଛତୁ 

ଏହା ନଭେମ୍ବର ରୁ ମାର୍ଚ୍ଚ ମାସ ପର୍ଯ୍ୟନ୍ତ ଚାଷ କରାଯାଇଥାଏ । ଏବେ ଧିଙ୍ଗିରି ଛତୁଚାଷର ସମୟ । ଧିଙ୍ଗିରି ଛତୁର ରଙ୍ଗ, ଆକାର ଓ ବାସ୍ନା ଭିନ୍ନ ଭିନ୍ନ ପ୍ରକାରର ହୋଇଥାଏ । ଏହି ଛତୁ ବ୍ୟବସାୟିକ ଦୃଷ୍ଟିରୁ ଚାଷୀକୁ ଭଲ ଲାଭ ଦେଇଥାଏ ।

 

କମ୍ ସ୍ଥାନ, କମ୍ କଞ୍ଚାମାଲ୍ ଓ କମ୍ ମୂଳଧନରେ ଏହି ଛତୁଚାଷ କରାଯାଇପାରେ । ଏତଦ୍ ବ୍ୟତୀତ ଏହାର ଜୈବଦକ୍ଷତା ଶତପ୍ରତିଶତ, ଅର୍ଥାତ ଯେତିକି ଓଜନର କଞ୍ଚାମାଲ୍ ଏଥିରେ ପ୍ରୟୋଗ ହୋଇଥାଏ , ସେହି ପରିମାଣର କିମ୍ବା ତାହାଠାରୁ ଅଧିକ ପରିମାଣର ଛତୁ ଉତ୍ପାଦିତ ହୋଇଥାଏ । ଆପଣ ଯଦି ୧କିଲୋ ଶୁଖିଲା ନଡା ନେବେ ସେହି ୧କିଲୋ ପାଖାପାଖି ଛତୁ ପାଇବେ । ଏହାର ଉତ୍ପାଦନ କ୍ଷମତା ଶତ ପ୍ରତିଶତ ଅଟେ । ଥରେ ବେଡ଼ ତିଆରି କରିଦେଲେ ଏହା ନିୟମିତ ବ୍ୟବଧାନରେ ୩ କି ୪ ମାସ ପର୍ଯ୍ୟନ୍ତ ଅମଳ ଦେଇଚାଲେ । ଏହି ଛତୁ ହେବା ପାଇଁ ମାସେ ସମୟ ନିଏ । 

ପ୍ରଥମେ ଗୋଟେ କୁଣ୍ଡ ତିଆରି କରିବେ ।କଟା ଯାଇଥିବା ନଡା ସବୁ କୁ ବସ୍ତା ଭିତରେ ବାନ୍ଧି ଦେବେ । ସେ ସବୁ ବସ୍ତା କୁ ସେହି କୁଣ୍ଡ ଭିତରେ ରଖି ତା ଉପରେ କିଛି ବାଉଁଶ ଦେଇ ଦେବେ । ତା ଉପରେ ଚୁନ ମିଶା ପାଣି କୁ ଢାଳି ଦେବେ ।ଚାହିଁଲେ କିଛି ପରିମାଣରେ ବ୍ୟଭିଷ୍ଟିନ ମିଶା ପାଣି ଦେଇପାରିବେ ।ନହେଲେ ଗରମ ପାଣି ଢାଳି ପାରିବେ । ସେ ସବୁ ନଡ଼ାକୁ ୮ରୁ ୧୦ ଘଣ୍ଟା ଛାଡ଼ିଦେବେ । ତାପରେ ବସ୍ତା ଗୁଡିକ କୁଣ୍ଡ ଭିତରୁ କାଢି ଛିଡା କରେଇ ରଖିବେ ଯେପରି ପାଣି ନିଗିଡି ଯିବ ଏବଂ ନଡା ଗୁଡିକ ହାତକୁ ଓଦା ଲାଗୁଥିବ କିନ୍ତୁ ପାଣି ବାହାରୁ ନ ଥିବ । ନଡା ଗୁଡିକୁ ବସ୍ତା ରୁ ବାହାର କରିଦେବେ । ତାପରେ ବେଡ଼ ପ୍ରସ୍ତୁତି ପାଇଁ ଦୁଇପଟ ମୁହଁ ଖୋଲାଥିବା ପଲିଥିନ ଜରି ବ୍ୟାଗ ନେବେ ଓ ତଳ ପଟ ଜରି ମୁଁହଁ ବାନ୍ଧି ଦେବେ । ପ୍ରଥମେ କିଛି ନଡା ନେବେ ତା ଉପରେ ଧିଙ୍ଗିରି ଛତୁ ମଂଜିକୁ ଚୁନା କରି ପକାଇବେ ଏହିପରି ସ୍ତର ସ୍ତର କରି ଉପରେ ନଡା ଦେଇ ଜରି ଉପର ମୁଂହ ବାନ୍ଧିଦେବେ । ଜରି କୁ ଚାରି ଆଡୁ କଣା କଣା କରିଦେବେ । ତାପରେ ଅନ୍ଧାରୁଆ ଜାଗାରେ ସବୁ ଜରି କୁ ରଖିଦେବେ । ୧୫ ଦିନ ପରେ ଜରି ଭିତରେ ମାଇସିଲ ହୋଇଗଲେ ଟିକେ ଆଲୁଅ ଜାଗାରେ ନେଇ ଜରି କୁ ଧୀରେ କରି ଦୁଇମୁହଁ ଖୋଲି ନଡା କାଢି ଦେବେ । ପାଳ ଛତୁ ରେ ଯେତିକି ଆଲୋକ ଦରକାର ହୁଏ, ଏ ଛତୁ ରେ ତାର ଏକ ଭାଗ ଆଲୁଅ ଦରକାର କରେ । ତଳେ ବ୍ୟାଗ ରଖିବା ଅପେକ୍ଷା ବ୍ୟାଗ କୁ ଝୁଲାଇ ବା ଭାଡ଼ି କରି ରଖିଲେ ଜରି ତଳେ ମଧ୍ୟ ଛତୁ ହୋଇଥାଏ ।

ପୃଥିବୀର ବିଭିନ୍ନ ଦେଶରେ ଅନେକ ପ୍ରକାରର ଧିଙ୍ଗିରିଛତୁ ଚାଷ ହେଉଥିଲା ବେଳେ, ଧିଙ୍ଗିରି ଛତୁର କେତୋଟି ଲୋକପ୍ରିୟ ପ୍ରଜାତି ସଂପର୍କରେ ଜାଣିବା ।